2011/02/28

Errezetak

Testua: Iñigo Gonzalez

Nire ideia bi plater eta postre bat egitea izan da. Bi plater horietatik bat aukeratu eta ondoren postrea jartzea izango litzateke nire ustez egokiena. Dena den, zuen eskura uzten dut, nahi bezala molda dezakezue lana.

1. Espagetiak atunarekin

Osagaiak (4 pertsonarentzat)

- 500 gramo espageti

- Piper gorri ½

- Piper berde ½

- Tipula bat

- 375 g atun(kontserban dagoen atuna)

- 500 g tomate frijitu (potokoa)

- Oreganoa

- Olioa eta gatza

Prozedura

Eltze bat urez bete eta sutan jarri. Irakiten hasten denean, olio zorrotada bat, bi koilarakada gatz eta espagetiak gehitu.

Espagetiak egosi bitartean, bota bi koilarakada olio zartagin batean, eta sutan jarri hori ere. Behin olioa berotu denean, tipula eta piper gorria zein berdea gorritu. Oharra: piperrak gustatu ezean, berenjenarekin edo kalabazinarekin ordezka daiteke.

Behin aurreko osagaiak gorritu direnean, tomatea eta atuna bota zartaginera. Ondoren, oreganoa gehitu.

Oreganoa gehitu ostean, berriz ere espagetiei erreparatu, gertu egongo baitira ordurako. Atera pasta eltzetik, ondo xukatu ura kentzeko eta plater batean jarri. Hori egin ondoren, zartaginekoa gainera bota, eta listo. Jateko prest dago. Oharra: espagetiak zartaginean dagoenarekin nahastu gura izanez gero, zuzenean espagetiak zartaginera bota eta nahi bezala nahastu.

2. Pasta perretxikoekin

Osagaiak (4 pertsonarentzat)

- 500 g pasta

- 350 g txanpinoi

- 150 g tipula xehatu

- 25 cl esnegain likido

- 50 g gazta (xerratan banatua)

- 2 baratxuri (xehatuta)

- 3 koilarakada olio

- Gatza eta piperbeltza

Prozedura

Eltze bete ur sutan jarri, eta gatza bota (10 g ur litroko). Irakiten hastean, pasta gehitu eta 8-10 minutu bitartean egosten utzi. (Oharra: pasta eltzera bota bezain laster nahasten hasi, eltzera itsas ez dadin). Behin pasta egosita dagoenean, xukatu eta hozten utzi.

Zartagin bat hartu, olioa bota eta txanpinoiak bertan frijitu, tipula eta baratxuriarekin batera (10 min inguru). Saltsa trinko bat sortzeko, gehitu gazta eta esnegain likidoa. Behin biak gehitu direnean, nahastu, saltsak trinkotasuna eta sendotasuna har dezan. Saltsa trinkoa geratu denean, gatza eta piperbeltza bota. Azkenik, saltsa pastari gehitu. On egin!

3. Fruta entsalada (postrea)

Osagaiak (4 pertsonarentzat)

- 2 laranja

- 4 mandarina

- 2 sagar

- 200 g anana

- Marrubiak

- Meloia

- Saltsa egiteko: laranja zukua (laranja 1), 5 koilarakada gazta fresko (Philadelphia adibidez) eta azukrea.

Oharra: edozein motatako fruta gehi daiteke entsaladara.

Prozedura

Entsalada egiteko, lehenik eta behin frutak ebaki behar dira. Zitrikoak (laranja eta mandarina) ataletan eta gainontzekoak (meloia, marrubiak, anana…) laukitxotan.

Entsaladaren saltsa prestatzeko, zukua, gazta freskoa eta azukrea nahastu. Ondoren, frutari gehitu eta prest dago. Oharra: entsalada hotza mahairatu behar da.