'Gernika bajo las bombas' TV movie-a estreinatuko dute Donostiako 60. Zinemaldian

Luis Mariasek zuzendutako Gernika bajo las bombas bi ataleko tv movie-a Donostiako 60. Zinemaldian estreinatuko da telebistaz eman aurretik. Lan hau Euskal Telebista, Erpin 360º, Vértice Cine eta Baleukok ekoitzi dute TV3,TVG, Canal Sur, ICAA eta Eusko Jaurlaritzaren partaidetzarekin.

Atal bakoitzak 75 minutuko iraupena izango du eta istorio errealak eta fikziozkoak nahastuko dituzte. Kontakizun guztiek lotura izango dute, 1937ko apirilaren 26an Kondor legioaren bonbardaketa izango baitute oinarri. Aktore euskaldunek eta atzerrikoek parte hartu dute, besteak beste, Marc Clotet, Aitor Mazo, Lander Otaola, Teresa Calo, Egoitz Sanchez, Sara Casasnovas, Roberto Alvarez, Antonio Dechente, Pep Tosar eta Ramon Bareak

Ekoizpenean lan-talde zabala aritu da: 60 teknikari, 43 aktore eta 700 lagunetik gora aritu dira figurante. Donostian, Hernanin, Oñatin, Oiartzunen eta Burgosen ibili dira filmatzen.

Proiektu honetan, Luis Mariasekin batera, Aitor Vitoria aritu da zuzendari laguntzaile lanetan. Asier Bilbao ekoizpenaren zuzendaria da eta Mikel Huercanos produkzio buru. Pau Monras argazkiaren zuzendaria eta Pello Villalba zuzendari artistikoa. Musikaz Jose Ramon Gutierrez Hermida arduratu da, Josune Lasa jantziez eta Eva Alfonso makillajeaz. Natalie Garcia eta Eduardo Barinaga dira produktore eragileak.

Read more »

Udako programazioa aurkeztu du ETBk

Donostiako La Perlako bainuetxeko terrazan aurkeztu dute ETBko udako programazioa.

Mihiluzek 1000 saio bete ditu eta saio berezia emango dute igandean. Laster gainera, pasa den asteazkenean Miramonen grabatutako Goenkaleren 18. urteurrena ospatzeko saio berezi bat emango dute denboraldiko azkenengo atalen ondoren.

Ekainaren 17an Bizirik saioa hasiko da. Programa berri hau Urko Aristi kazetariak aurkeztuko du eta Euskal Herriko herri txikietako bizimodua erakutsiko digu. Saio bakoitzean bi herri alderatuko ditu. Pausoka ekoiztetxeak ekoitzitako Yes we jai! saioa ere uda honetan hasiko dira emititzen. Hiru atzerritar gure herri eta hirietako jaietan murgilduko dira. Uda bukatzen denean Euskal Herriko festarik onena aukeratuko dute.

Hiru atzerritar hauek ez ezik Navarra Directo eta Euskadi Directo saioetako erreportariak ere jairik jai ibiliko dira uda osoan zehar.

Robin Food saioak 500 atal beteko ditu eta urteurrena ospatzeko David de Jorge sukaldariak

Pedro Subijana, Karlos Argiñano eta Alberto Chicote sukaldariez gain, Juan Echanove aktorea eta Gran Wyoming eta Andreu Buenfuente aurkezleak izango ditu lagun.

Klaudio Landak Ni más ni menos saioa aurkezten jarraituko du udan zehar eta ondoren western pelikulak emango dituzte. 

Astelehenetan Cien X Cien saioa aurkeztuko du Carlos Soberak, zortzi lagun euskadiren inguruko galderak erantzuten arituko dira. Astearteetan Felix Linaresek aurkezten duen La noche de... saioa aurkezten jarraituko du. Asteazkenetan Reyes Prados andaluziarrak aurkeztutako De boca en boca eztabaida saioa aurkeztuko du. Iñaki Lopezek aurkezten duen 60 minutos izeneko saioa ekain bukaeran amaituko da eta bere ordez erreportaje bereziak emango dira ostegunetan. Ostiraletan Africa Baeta teleberriko aurkezleak gidatutako Tu plato favorito saioa emititzen hasiko dira laster. 

Larunbat gauetan filmak emango dituzte eta igandeetan berriz Julian Iantzik aurkeztuko duen Conquistour saioa emango dute. 'El Conquistador del Fin del Mundo'ko lehiakide ohiek osatutako taldea, bisitatutako herriko koadrilaren aurka arituko da, nor baino nor gehiago. 

ETB3n umeentzako programazioarekin jarraituko dute eta horretaz gain udako musika jaialdiek leku zabala izango dute bertan: Azkena Rock, Bilbao BBK Live, EH Zuzenean, Pirineo Sur eta Miarritzeko Big Festivalak adibidez. Lehen hitzordua, datorren asteburuan izango da, Gasteizko Azkena Rock jaialdian. 

Emanaldi bereziek ere beraien lekua izango dute, besteak beste, Donostia eta Bilboko Suak, Portugaleteko Munduko Dantzak, Donostiako Txistulari Kontzertu Nagusia, Errekortari txapelketa, Lekeitioko Antzar Eguna, Txirri, Mirri eta Txiribitonek Euskadiko Orkrestrarekin Bilbon eskainitako kontzertua eta Gasteiz eta Donostiako Jazzaldietako kontzertuak.

Kirolak ere presentzia handia izango du udako programazioan.

Read more »

Ibon Urrutia: “Ezin zara sartu esanez beste 2000 pertsonaren modukoa zarela, norberaren marka berezia utzi behar da han”

Jende askorentzat Ibon Urrutia (Bilbo, 1992) izan da “El conquistador del fin del mundo” lehiaketaren aurtengo edizioko konkistatzailea. Irabazi ez duen arren, lehiaketatik ez da esku hutsik itzuli. Publikoaren gustokoena bera izan denez, bidaiatzeko 3000 euro irabazi zituen atzoko finalean (%31,1eko ikusle kuota). Irakasle ikasketak egiten ari da egun bilboko gazte polifazetikoa.

Iritsi zaren lekura iritsiko zinela uste zenuen?

Egia esan ni hara joan nintzenean asko ez pentsatzea erabaki nuen baina hala ere, urrun helduko nintzela uste nuen. Lagunek aldiz, badirudi bazekitela programa nola joango zen eta hasieratik esaten zidaten gutxienez finalera helduko nintzela!

Etxetik horrelako espektatibak eramanda, ezin gutxiago eman! (kar, kar, kar) 

Nolatan erabaki zenuen ‘El conquistador del fin del mundo’ saioko casting-era aurkeztea? 

Conquistadorearen kontu horrekin nahiko goiz hasi nintzen. 16 urte nituela auzoko lagun batekin adostu nuen aurkeztuko nintzela eta horrela egin nuen. Lehengo casting-ean ez nuen zorterik izan baina bigarrenean aldiz bai. Ikusi nuen lehengo egunetik gustatu zitzaidan programa eta kamisetetan jartzen duen moduan: non gogoa han zangoa. Gogoak banituen bai.

Zaila izan da horrenbeste jendek sartu nahi duen lehiaketa batean sartzea?

Nik espero nuen casting-ak luzeagoak izango zirela, eta 5-7 minutukoak dira bakarrik. Hori egitearekin listo. Ondoren deiak datoz eta froga medikuak ere. Nik espero nituen aurreko probak, baina ez zegoen bigarren casting-ik eta 5 minutu horiekin balio badie, nahikoa.

Argi dagoena zera da: astakeriaren bat esatea oinarrizkoa dela esatea eta kapitainei buruzko zer edo zer ere bai. Ezin zara sartu esanez beste 2.000 pertsonaren modukoa zarela, norberaren marka berezia utzi behar da han.

Bertara iritsi eta bizitakoa bizi ondoren, saioarekiko zenuen ikuspegia aldatu al da?

Erabat. Etxetik ikusten dena nire ustez politena da: probak, paisaiak, txisteak...baina atzekoak ere badaude. Atzekoak kamara kontuak dira, hara joan eta hau grabatu, besterea mugitu eta bestea grabatu.

Atzekoen artean ere desplazamenduak zeuden, hegazkinez, kotxez eta autobuses, horien artean 26 orduko bidaia autobus baten barruan!

Etxetik ematen duen bezain gogorra da lehiaketa edo unerik zailenak erakusten dira?

Telebistan gogorra dela nabaria da bai, baina ikusten ez dena gosea da. Ez berez gosea, baizik eta ahultasun sentsazioa, altxatzeko gogorik ez izatea eta egunerokotasuneko nekea. Lo egin eta berdin berdin esnatzea.

Eguraldiaren kontuarekin zorte ona izan dugu aurten, ez baitu ia hotzik egin. Hala ere niretzako gogorrena orduak eta egunak egoera horretan jasatea zen.

Erraza da tranpak egitea?

(Kar, kar, kar) galdera ona. Programan tranpa mota asko daude, hala nola, probetan egiten direnak, kamara atzean egiten direnak eta joan aurretik egin daitezkeenak. Baina hala ere tranpak egiteko motibazio onena gosea da.

Helburua jatea izanda milaka tranpa egiten saia zaitezke, hori bai, kontu handiz, beti adi eta kamara eskuan daudelako. Hala ere noizbehinka lortzen da horrelakoak egitea.

Lehiaketatik pasatzeak nola aldatu du zure bizimodua, baldin eta aldatu badu?

Nire kasuan ez zait bizitza ia aldatu, hangoa niretzako han geratu zelako. Hala ere argi dago Euskal Herri mailan “el conquistador” hau oso arrakastatsua dela eta eragin minimoa sortzen duela edonorengan.

Zenbait ikastoletatik ibili naiz nire hango esperientzia azaltzen eta jendea apuntatzeko animoak ematen.

Bestetik nik nire bizitzarekin jarraitzen dut lehen moduan eta horrela jarraitzea espero dut aurrerantzean. Hala ere eitb-tik eskaintzaren bat agertzekotan pentsatuko nuke! (kar, kar, kar).

Erraza izan da ikasketak eta lehiaketako egonaldia konbinatzea?

Hasiera batean oso zaila ikusi genuen kurtsoarekin aurrera egitea kanpoan hilabete bat ikasi gabe egonda. Hala ere irakasle guztiekin hitz egin nuen eta lauhilabete bukaeran pilak jarri ondoren, ez nintzen atzean geratu.

Esan beharra daukat Haur Hezkuntzako gradua oso praktikoa denez, hainbat praktika galdu ditudala nabaritu dudala eta galdutakoak zaila da pasatutakoan berreskuratzea.

Zer eman dizu lehiaketak?

Niretzako politena izan da ez dela lehiaketa bat bakarrik izan. Han ikusitakoak niretzako harrigarriak izan dira, batez ere programako azkenengo etapan (Iguazu-ko ur-jauziak).

Ezagutu dudan jendea ere oso ezberdina da nirekiko eta harritu naiz han bizitako esperientziek sortzen duten lotura pertsonen artean.

Argi daukat niretzako kriston esperientzia errepikaezina izan dela eta han ikasitakoak ez nituzkela hemen inoiz ere ikasiko.

Aipagarrienen artean ere badago, han egonda familia, lagun eta jendea hurbilarekiko daukadan dependentzia. Bueltatutakoan jaso nuen harrera ahaztezina izango da niretzako.

Zer eman diozu zuk lehiaketari?

Programakoek casting-ak egiterakoan perfil mota ugari bilatzen dituzte fisikoari eta arlo psikologikoari erreparatuz. Saiatzen dira ahalik eta publiko gehienengana hurbiltzen. Nire kasuan publiko gaztea integratzen saiatu dira eta zenbait kasutan lortu ere. Gaztetxo kirolariaren irudiarekin sartu nintzen ni eta han egindakoa ikusita, asmatu dute.

Lehiaketan sorpresak eman ditudala uste dut, hasiera batean faborito ziren horietako batzuk atzean geratzen ziren bitartean. Sorpresa horiek  programa mamitsuagoa egiten dute.

Testua: Ander Barinaga-Rementeria

Read more »

EiTBk 30 urte

Gaur 30 urte,1982ko maiatzaren 20an, Eusko Legebiltzarrak Euskal Irrati Telebista sortzeko legea onartu zuen.

1979ko Autonomia Estatutuan komunikazio erakunde bat sortzeko aukera bildu zen. Eusko Jaurlaritzako lehenengo hauteskundeak EAJk irabaiz zituen 1980an eta Karlos Garaikoetxea lehendakariak, Ramon Labaien izendatu zuen kultura zinegotzi. Labaienek Euskal Irrati Telebista sortzea beharrezko eginbehartzat zeukan euskara normalizatzeko bidean. 1981ean Bizkaiko Foru Aldundiak Iurretan 53.000 m2 lur erosi zituen eta urte horretako azaroan hasi ziren Euskal Telebistaren egoitza izango zenaren eraikitze lanak.
EiTB 5/1982ko maiatzaren 20ko legearen bidez sortu zuen Jaurlaritzak, Autonomia Estatutuko 19. artikuluari jarraiki.[1]

Hasiera denak izaten dira zailak, hutsetik hasi behar izaten da askotan eta hau izan zen EiTBren kasua. Hego Euskal Herrian ikusi zitezkeen telebista kate bakarrak RTVErenak ziren. Irrati eta Telebista bat ezerezetik martxan jartzeak gainera, lan handia eskatzeaz gain, formakuntza bat ere eskatzen zuen. Hori dela eta 1981ean Gasteizen Telebista Eskola bat zabaldu zuten Eusko Jaurlaritzaren egoitzaren sotoan. EiTB martxan jarriko zuen langile talde bat heztea zuen helburu eskola honek. Studio Hamburg enpresa alemaniarra kontratatu zuten aholkulari moduan eta 1982an euskal langile talde bat –zazpi kazetari eta 24 teknikarik osatua- Alemaniara joan zen ikasi beharrekoak ikastera. [2]
Bitartean, gurean Iurretako estudioak eraikitzeko lanek martxa onean jarraitzen zuten. Madrileko Page Ibérica enpresa punta-puntako instalazioak eraikitzen ari zen Bilboko IDOM enpresaren zaintzapean.
Madrilen PESA enpresa (Productos Electrónicos S.A.) lehenengo unitate mugikorra eraikitzen zebilen eta bertatik aireratu zen lehenengo aldiz Euskal Telebistaren seinalea euskaldunen etxeetara 1982ko abenduaren 31n. Gaueko hamabietan Euskadiko Orketra Sinfonikoak interpretatutako Agur Jaunak kantak eman zion hasiera Euskal Telebistaren lehenengo emanaldiari. Irudietan antena paraboliko baten mastan eskegita zegoen ikurriña bat ikusten zen.

Ikus-entzuleek ikusi zuten lehenengo irudia

Xabier Elorriagak zuzendu zuen lehen saio hura eta Elene Lizarralde eta Mari Jose Insausti izan ziren aurkezleak.
Hitzokin hasi zuten saioa:
Mari Jose: Ikusle maiteak, jaun-andreak, gabon. Gabon eta Urte berri on!
Elene: Urte berri on, bai, gure oso-oso berri Euskal Telebista estudiotik. Urte hau aurrekoa baino hobea izan dadila zuretzat, zure senideentzat, zure lagun eta adiskideentzat, herri honetako seme-alabentzat eta munduko herri guztietakoentzat.
Mari Jose: Eta, lehen ordu hauetan, 1983ko lehen minutu hauetan, Euskal Telebista honek bere lehen programari ekiten dio. Bere lehen probatako programari.
Elene: Nahiz eta erabateko egia izan ez, pentsa dezagun unetxo batez gure Euskl Telebista hau erabateko errealitate bat dela, eta Euskadi osoa gu ikusteko eta entzuteko antenaz berterik dagoela. Euskadiren zerbitzuan jaiotzen da Telebista hau; ikusteko eta entzuteko, hain zuen ere.
Mari Jose: Eta zergatik ez, hau guztia errealitate izango da later asko. Eta, horretarako, hori guztia egia izan dadin, gaur, 1993. urtearen sorreran, jandaurreko lehen pauso hauek ematen ditugu, benetan uste duguna baino gehiago zaretelakoan. Zorionak, bada, eta aurrera.
Elene: Eta, hasteko, hona Karlos Garaikoetxea lehendakariak urte zaharraren inguruan emandako mezua. Adi-adi bazaudete gu ere aipatzen gaituztela konturatuko zarete.

 

Hainbat arazo tekniko zirela eta, lehenengo emanaldi honek hainbat muga izan zituen, besteak beste, ikusle askok ezin izan zutela ETBren seinalea hartu. Durangaldean inongo arazorik gabe ikusi ahal izan zen programazio guztia. Bilbo inguruan erdizka baino ez. Lehenengo emanaldi hau baino lehen, Ganetako ekableatu zerbitzua tximista batek hondatu zuen, Zaldiarango zentroko ekipamendua atzeratuta zebilen eta Jaizkibelgo zentroak TVErekin adostu behar zuen emanaldien amaiera ETBko seinalea emititzen hasi ahal izateko. Andoni Areizaga, EiTBko zuzendariak hurrengo hilabeteetako plana zein izango zen zehaztu zuen: “Zero programa honen ondoren, hiru etapa izango ditugu. Lehenengoan seinaleak baino ez dira igorriko, eta telebistak emanaldietara egokitzeko balioko du. [...] Bigarren etapa urtarrilaren bigarren astean zehar izango da, eta bertan albistegi laburrak eskainiko ditugu, bai euskaraz, bai gaztelaniaz eta bai filmen bat ere. Hori guztia ordubetean. Hirugarren etapari bigarren hiruhilekoan ekingo diogu; horrela pixkanaka hiru orduko emanaldietara iritsi nahi dugu urtearen bukaerarako”.
Euskadi Irratia, hilabete lehenago hasi zen emititzen 1982ko azaroaren 23an. Radio Euskadi berriz, lehenago, 1946ko abenduaren 21ean sortu zen "Radio Euzkadi, la Voz de la Resistencia Vasca" izeneko irratiaren ondorengoa litzateke. Lapurdin sortu zen irrati hau eta 1977ra arte iraun zuen erbestetik Euskal Herriaren berri emanez. 1983ko apirilaren 29an sartu zen EiTB taldearen barruan. Gaztelaniaz emititzen du. Bere euskarazko baliokidea, lehen aipatu, Euskadi Irratia litzateke.
1983ko urtarrilean Euskal Telebistak kontratuak egiteko ahalmena bereganatu zuen, ordura arte langile guztiak kultura sailarentat egiten baitzuten lan.
1983ko otsailaren 16an amaitu zen froga-emisioen epea. Urte horretan bertan hasi ziren Donostiako Miramongo produkzio-zentroaren eraikuntza lanak. Beste hainbat unitate mugikor ere erosi zituzten.
1986ko maiatzaren 31n sortu zen ETB 2 katea. Jose Maria Gorordo zen EiTBko zuzendaria eta garai hartako egoera aprobetxatuz, isilean eta inori ezer esan gabe aireratu zuten ETB 2 katea probatan. EiTBn lanean ari ziren langile gehienek ere ez zuten honen berririk izan harik eta emititzen hasi zen arte.
Euskal Irrati Telebistako Zuzendaritza Nagusiak jakinarazten dizue gaur, maiatzaren 12ko zazpi eta erdietatik aurrera, Euskal Telebistak programa berria hasiko duela probatan [...] Erabaki hau euskal titulartasun publikoko komunikabideak hazi eta kontsolidatzeko prozesuaren barruan kokatzen da.
Ohar honekin eman zuten ETB 2 katearen sorreraren berri emititzen hasi baino ordu erdi lehenago. Il carnavale di Venezia filmarekin hasi zen Euskal Telebistako bigarren katearen bidea. Kate berri hau sortzeak iritzi eta kritika ugari izan zituen. Baina hiru ziren funtsean, bigarren katearen sorreraren inguruko eztabaidagai nagusiak: erabakiaren zilegitasuna, neurriaren legezkotasuna eta EiTBren ereduaren aldaketa (euskara eta euskal kultura bultzatzeko sortu baitzen eta erabaki honekin gaztelera hutseko kate berri bat sortu baitzen). Iurretako instalazioetan beste plato bat prestatu beharra zegoen ETB 2ren eta ETB 1en emisioak aldi berean egin ahal izateko. 1987ko otsailaren 20an Miramoneko EiTBren egoitza inaguratu zen. Urte bete beranduago, 1988ko azaroaren 20an Baionako EiTBren egoitza zabaldu zen.
90eko hamarkadan telebista kate pribatuen etorrerarekin batera, audientzia bereganatzeko lehiak gora egin zuen nabarmen. Hamarkada honen lehenengo urtean sortu zen Euskadi Gaztea irrati formula, 1990eko martxoaren 21ean hain zuzen ere.
2001ean ETB Sat katea sortu zuten Digital+ bidez zein ASTRA satelitearen bitartez ETBren emisioak Europara zabaltzeko. Canal Vasco katea berriz, Amerikan emititzeko sortu zen. Kate bi hauek produkzio propioa baino ez dute emititzen eta euskara zein gazteleraz emititzen dituzte edukiak. Azken kate honen eduki gehienak baina, gazteleraz dira. ETB Sat-ek bi hizkuntzen arteko banaketa orekatuagoa egiten du. Orain artean Euskal Autonomia Erkidegoan emititzen zen ETB Sat-en seinalea eta gainontzeko Europako eskualdeetarako emititutakoa ezberdinak ziren. 2011ko irailetik hona, EAEko ETB Sat-en emisioei ETB K Sat izena jarri diete eta ETB 4ren proiektuaren ordezko bihurtu da, kirola ardatz harturik osatuta baitago emisioa. 1998an EiTBren sorrerako legea aldatu zen ikus-entzunezkoen egoera berrira egokitzeko asmoarekin eta Eusko Jaurlaritzak EiTBren kontrol handiagoa izateko asmoarekin. 1999an inaguratu zuten EiTBren Iruñako egoitza.
2002an, Andoni Ortuzar buru zuen EiTBren zuzendaritzak, Iurretako egoitza Bilbora eramateko asmoa adierazi zuen. Horrela Bizkaian zehar sakabanatuta zituen hainbat egoitza batu nahi ziren. San Mames-en kokatuta zegoen Bilboko Erakustazoka Barakaldora eraman zutenean, 7 eta 8. pabilioiak EiTBren esku geratu ziren, 8. Pabiloia baina ez du osorik erabiltzen EiTBk, bertan beste komunikazio enpresa batzuk (Antena 3, El Mundo...) eta Bizkaiko Ogasunaren instalazioak daude. Instalazio berriak 2007ko apirilaren 3an inaguratu ziren, eraikitze lanak guztiz bukatu gabe zeudela eta 2007ko irailaren 25ean amaitu zen transladoa. Digibat sistemaren bitartez Miramon eta Bilboko egoitzak elkarrekin lotuta daude.

2008ko urriaren 10ean, arratsaldeko seirak inguruan, ETB 3 katea jarri zen martxan Bilboko egoitzako Multibox aretoan egindako emankizuna bukatu ondoren.
Itzalaldi analogikoarekin batera, 2010ean EiTBri, LTD bidez emititu ahal izateko lau katedun Mux edo Multiplex bat eman zitzaion. LTD bidezko emisioak ETB 1, ETB 2, Canal Vasco eta ETB SAT (egun ETB K Sat) kateak emititzen zituen. Baina, ETB 1 eta 2 ez ziren Multiplex horretako kateak betetzeko ETB 3 eta ETB 4 sortzea erabaki zen. ETB 3, lehen aipatu bezala 2008an hasi zen emititzen eta haur eta gazteentzako programazioa eskaintzen du euskara hutsean (Gaur egun batez ere haurrentzako marrazki bizidunak ematen ditu, Teknopolis, Sut&Blai, Hitzetik Hortzera eta Gazte Klip bezalako programa bakar batzuk kenduta). ETB 3 sortu zenetik, Canal Vasco satelite bidez baino ez da ikusten. ETB 4-k berriz kirol programazio zabal bat eskainiko zuen eta bere emisioak 2009an hastea adostuta bazegoen ere, oraindik ez da kate berri hau sortu. Horren ordez, ETB K Sat-ek eskaintzen du kirol programazio hori. Ez da berdina beraz, Europan satelite bidez ikusten duten ETB Sat eta EAEn ikusten den ETB K Sat.

---

[1] Estatutuko 19. artikulua

1.- Euskal Herriari dagokio giza kominikabideei dagozkienetan Estatuko oinarrizko arauen legeria aurrera eramatea, Konstituzioaren 20. artikuluan agintzen dena beti ere errespetatuko delarik.

2.- Titulartasun estatala duten komunikabideei aplikatu behar zaien arautegi bereziari dagokionez, goiko parrafoan aipatu diren gaien bururapena Estatutoarenarekin koordinatuko da.

3.- Artikulu honetako lehen parrafoan esaten den bezala, Euskal Herriak erregula, sor eta atxiki ditzake bere telebista, irrati eta prentsa propioa, eta, oro har, bere helburuak lortzeko behar dituen giza komunikabide guztiak.

[2] Erredakzio sailetik Luis Alberto Aranberri Amatiño, Xabier Zaldua (Radio San Sebastián-SER), Mikel Urretabizkaia (Egin), David Barbero (Deia), Luis Maria Mendizabal (Diario Vasco), Maria Francisca Fernandez Valles (Eusko Jaurlaritzako prentsa bulegokoa), Estepan Aldamiz-Etxeberria (Deia) eta Aingeru Epaltza (kazetaritza ikasketak oraindik amaitu gabe zeuzkana) joan ziren. Teknikariak bestalde, Eloy Diaz de Monasterioguren, Juan Luis Olaeta, Juan Jose Cuadrado, Javier Coto, Kepa Garai, Gontzal Urrestarazu, Esther Arrieta, Iñigo Urrega, Rafa Ocio, Juan Karlos Loroño, Juanma Sancho, Angel Etxeandia, Julio Mendikute, Javier Aparicio, Karmelo Egia, Patxi Hidalgo, Antxon Astrain, Fran Arrieta, Josu Dilla, Jon Mikel Telletxea, Felix Gonzalez, Sabin Arruti, Bernardo Amo, Oscar Argudo, Iñaki Arranz, Gozon Asla, Josu Aurtenetxe, Iñaki Beobide, Joseba Esnal, Roberto Martinez, Fidel Molinero, Xabier San Salvador, Iñaki Ugalde eta Josu Uriarte joan ziren Hamburg-era.

Testua: Miguel Aizpuru eta Ander Barinaga-Rementeria (http://eitb.wikispaces.com/)

Read more »

Telebista autonomikoak pribatizatzeko aukera dago

Espainiako Ministro Kontseiluak autonomia erkidegoen esku utzi du telebista publikoak pribatu bihurtzeko aukera. Horrela, autonomia erkidegoek nahi izanez gero telebista publikoko zerbitzu batzuk pribatizatu edo telebista publikoa bera osorik pribatizatzeko aukera izango dute, lehiaketa publiko bidez. Egun, 13 komunikazio enpresa publikoen aurrekontua 1.400 milioi euro ingurukoa da eta kopuru horren %75a diru publikotik dator, gainontzeko %25a aldiz, publizitatetik lortutako irabaziak dira.
Neurri honekin, EiTB taldeak ere pribatizatzeko aukera izango luke legez, nahiz eta EiTBren sorreran finkatutako helburuak kate pribatu batenarekin bateragarriak ez izan.

Read more »

'Lokaleroak' gala ospatuko da larunbatean Plateruenan

Euskal Telebistaren hirugarren kateko 'Lokaleroak' saioak gala berezi bat ospatuko du larunbat honetan Durangoko Plateruena Kafe Antzokian gaueko 22:00etatik aurrera. 19:30etatik aurrera baina, kanpoan musika eta sorpresak ez direla faltatuko esan dute antolatzaileek.
Gala honetan kontzertuak, erromeria, Zaparrada batukada, gauerdi partean Oihan Vega DJ-a, elkarrizketak eta sari banaketa bat ere egongo da. Izan ere Unerik xelebreenaren saria, Urrezko minutuaren sarea eta anfitrioi onenaren saria banatuko dituzte. Lehenengo denboraldiaren errepasoa egingo dute Jon Gomez Garai galdakoztarraren gidaritzapean.
Zornotzako Pausa Digital ekoiztetxea saioaren bigarren denboraldia prestatzen ari da Euskal Telebistarentzat.

Read more »

ELKARRIZKETA: Yannick Vergara: “Beti gustatu izan zaizkit erronkak eta ez naiz kikiltzen ametsak egia bihurtzeko borroka honetan”

Yannick Vergara (Gurutzeta, Barakaldo, 1983) antzerkian, zinean eta telebistan lan asko eginikoa da. Goenkale saioak egin zuen ezagun. Aste batzuetako atsedenaldiaren ondoren, ostiralean euskal telebistaren bigarren katean ikusiko dugu berriz Vaya Semanita saioaren atal berrietan pertsonaia zahar eta berriak hezur-haragitzen.

Leyre, Vaya Semanitako pertsonaia berria (Argazkia: Miriam Cabeza)

Noiz esan zenion lehenengoz zure buruari aktore izan nahi zenuela?

Ez dut momentu zehatzik gogoan, baina bai aurreskolan denek printzesa izan nahi zutenean, nik aktore izan nahi nuela.

Eta pentsatu zenuen inoiz horren urrun iritsiko zinenik?

Urrun? Egia esan, ez dut sekula horretan pentsatu. Ez dakit urrun heldu naizen ala ez. Hasieran jende askori erakutsi behar izan nion honetarako gai nintzela eta hori lortzeko ondo prestatuta egon behar nuen; beraz, nahikoa lan izan nuen (eta dut) interpretazioari buruzko guztia ikasten. Helburua argi zegoen: aktore moduan lan egitea, hemen, Madrilen, atzerrian...berdin zitzaidan, baina bizimodua aktore gisa atera nahi nuen.

Argazkia: Fernando Foto

Errazak izan ziren lehenengo urratsak?

Lehenengo urratsak beti izaten dira zailak. Esan bezala, oztopo askori egin behar izan nion aurre hasieran, baina beti gustatu izan zaizkit erronkak eta ez naiz kikiltzen ametsak egia bihurtzeko borroka honetan. Momentu latzetan ere gauza asko ikasten da eta nik ikasi dut une gogor horiei alde ona ikusten.

Hainbat irakasle ezberdin izan dituzu.

Bai, zorionez teknika eta metodologia ezberdinak ikasteko aukera izan dut. Bakoitzak tresna ezberdinak eman dizkit eta, orain, batetik bestera egiten dut salto, egoerak eskatzen didanaren arabera. Gainera, iaz Adán Blacken esanetara ikasteko parada izan nuen eta esperientzia zoragarria izan zen: lanean ari naizen bitartean, jolasten, amesten eta nire buruarengan konfiantza izaten ikasi nuen.  

Arte Dramatikoaz gain, itzulpengintza ere ikasi zenuen Gasteizen.

Bai, txikitatik besteekin komunikatzea gustatu izan zait eta hizkuntzak ikastea aukera paregabea zen hori lortzeko. “B plan” gisa hartu nuen nire gurasoen lasaitasunerako eta batzuetan oso erabilgarria izan zait.  

Vaya Semanita saio historikoaren belaunaldi berriko aurpegietako bat zara. Zer nolako esperientzia da bertan lan egitea?

Krisi garaietan ere, gogor eta ilusioarekin lan egiten duen familia ederra osatu dugu eta horrek ez du parekorik. Lantalde moduan egiten dugu lan eta horrek errazago egiten du programaren erritmo bortitza jarraitu ahal izatea. Gainera, aktore moduan pertsonaia ezberdin asko lantzeko aukera ematen digu eta izugarri ikasten da. Bihotzez eskertzen diot Vaya Semanitako familiari hasieratik erakutsi duen niganako konfiantza eta egunero eskaitzen dizkidan babesa eta maitasuna.

Aurretik Goenkale-n ibili zinen... Vaya Semanita-rekin alderatuta desberdintasun handia dago?

Vaya Semanitak askoz erritmo azkarragoa du eta gehiena platotik kanpo grabatzen dugunez, lanordu gehiago behar dira. Gainera, denok egiten dugu lan egunero, Goenkalen ez bezala; beraz, askoz nekatuago bukatzen dugu astea. Hala ere, erritmoa eta erregistro aldaketa alde batera utzita, oso antzekoak dira: familia giroa dago hasierako egunetik, pertsona zoragarriek egiten dute lan eta, ahal den neurrian, produktua maitasun handiz hartzen saiatzen dira.

Ez da fikziozko umorean lan egiten duzun lehen aldia baina, aurretik Qué vida más triste eta Euskolegas telesailetan ere parte hartu zenuen.

Bai, atal gutxi batzuetan azaldu nintzen eta komedian lanean hasteko oso erabilgarri gertatu zitzaizkidan biak. Presiorik gabe erregistroari neurria hartzeko aukera eman zidaten.

Argazkia: EiTB

Ostiralean bigarren denboraldia estreinatuko duzue gaueko hamarretan, zer ikusi ahal izango dugu?

Aurreko denboraldiko pertsonaiarik gogokoenak eta maitasun handiz landutako pertsonaia berri eta zoragarriak agertuko dira denboraldi berri honetan, ikuslearen irribarrea lortzeko prest. Aurpegi berriak ere izango dira eta programaren erritmoa azkarragoa izango dela esango nuke. Baina ezin dut gehiago aurreratu...Ostiralero zuen zain izango gara.

Horrenbeste lan egin ondoren, kalean, jendeak ezagutu egingo zaitu, ezta?

Bai, egoeraren eta herriaren arabera. Pixkanaka ari dira Vaya Semanitako pertsonaiengatik ere ni ezagutzen; baina oraindik, gehienek Rakel deitzen didate. Hiru urtez aritu nintzen Goenkalen pertsonaia samur eta alai horrekin eta zaila da hura ahaztea. 

Azkenengo lan asko euskaraz eta gazteleraz aldi berean egin dituzu: Amamaren memoria (¿Te acuerdas, abuela?), Anfitrioi berezia (El extraño anfitrión)... nolakoa izan da esperientzia hau?

Hasieran, beldur apur batekin hartu nituen, baina lanbide honetan beti presaka gabiltza eta ez digu pentsatzeko astirik ematen, zuzenean ekin behar izaten diogu erronkari. Lehendabiziko egunetan, mesfidati ibiltzen gara, baina uste baino errazagoa da. Agian, itzultzaile senak ere laguntzen didalako izango da...

Zein hizkuntzatan sentitzen zara erosoen?

Erabat elebiduna naiz eta bietan eroso sentitzen naiz. Hasieran, Barakaldokoa izanda, mundu guztiari erakutsi behar nion euskaraz ere ondo moldatzen nintzela, baina gero ohitu dira ni bi hizkuntzatan ikusten. Nik esango nuke, proiektu bereko bi bertsioak ikusita, ez legokeela inongo alderik nire interpretazioari dagokionez. Norbaitek proba egin nahi badu, aurrera!

Denetarik egin duzu, aktore lanak, dantza, bikoizketa, itzulpengintza, script lanetan ere ibili zara... zein asmo dituzu etorkizunera begira?

Ahal dudan heinean, aktore lanetan jarraitu nahiko nuke, baina hori nire esku ez dagoenez, besterik egin behar badut ere, gustura egingo dut. Azken batean, jakituriak askeago egiten gaitu eta, ipurterre hutsa naizenez, beti saltsaren batean egon behar dut. Hori bai, eskertuko nuke kultura bultzatzeko baliogarria izatea. 

Testua: Ander Barinaga-Rementeria 

Read more »

Artxiboan soluzio bila

Argazkia: EiTB

Euskal Telebistak hutsetik hasi beharrean artxiboan bilatu eta 90. hamarkadako Bi eta Bat telesailaren atal berriak grabatzeari ekingo diete. Eneko Olasagasti eta Karlos Zabala arituko dira zuzendari lanetan, hasiera hartako telesailaren sortzaileak. Hiru aktore protagonistak ere berberak izango dira: Jose Ramon Soroiz, Elena Irureta eta Ane Gabarain. 

Joxe Lontxo, Jaione eta Idoia hiru protagonistak etxe berean bizi dira eta auzoko eta lagunekin dituzten gora beherak dira telesailaren ardatza. Oinarria mantenduko badute ere gaur egunera egokituko dituzte tramak. Hiru denboraldi eman zituzten 1991, 1992 eta 1993an.

Read more »

'El conquistador' saioaren lehenengo atalak hirukoiztu egin du ia etb 2ren audientzia

'El conquistador del fin del Mundo' ETB 2ko reallity arrakastatsuaren zortzigarren denboraldiaren lehenengo atalak %24,9ko audientzia zatia eskuratu zuen atzo. Lehiaketak azkenengo edizioetan izandako hasierarik onena izan du. 244.000 ikus-entzulek ikusi zuten saioa bataz beste Hego Euskal Herrian. Andoni izan da aurten etxera joan den lehenengo lehiakidea eta bere asanbladako lekukotzaren unea izan zen saioko unerik ikusiena edo urrezko minutua gaueko 23:45etan %33,8ko share-arekin.

Interneten ere www.eitb.com atariaren 'El Conquis'eko webguneak 23.000 bisita izan zituen atzo. Aipagarria da gainera, twitter-eko trending topic, hots uneko gai komentatuenetakoa izan zela #conquis etiketa. ETB 2ren audientzia datu eskasak hobetzea lortuko du aurtengo edizioak?

Read more »

2011, ETBk ikusle gutxien izan duen urtea

ETB 1-ek %2,2ko ikusle-kuota izan du 2011an Bizkai, Gipuzko eta Araban. ETB 2-k aldiz, %8,14koa.

Bi kateek inoizko audientzia daturik txarrenak izan dituzte. Goenkale, Finlandia, Mihiluze eta kirol emanaldiak dira euskarazko katean gehien ikusten diren saioak. Horrek zerbait hobetu ditu kateraren bataz besteko datuak. Aipagarria da ETB 1-en azkenengo sei urteetan ikus-entzule gehien izan duen emanaldia Real Madril-Bartzelona Txapeldunen ligako final-erdietako partida izan zela %44,3ko kuotarekin.

ETB 2 katean berriz, La noche de..., El conquis eta Ni más ni menos magazinea dira ikusle gehien dituzten saioak. Vaya Semanita cambio radical saioari ondo etorri zaio aurpegi aldaketa eta oso datu txukunak izan dituzte lehenengo zortzi saioek. Hori dela eta zuzendaritzak Pausoka ekoiztetxeari kontratua berritu dio eta hilabete honetan bertan hasiko dira atal berriak emititzen. Lehenengo zortzi kapituluetan ikustako pertsonaiez gain (Goreti ileapaintzailea, Koro Echevarría, Benan, Mike, Nago...) Kontaidazu familia zein beste pertsonaia batzuk ere ikusi ahal izango ditugu atal berrietan. 

Arratsaldero, Anitzele eta Plató 2.0 saioak kendu dituzte eta Ai ama! izeneko ordu erdiko elkarrizketa saio bat aurkeztuko du Iban Garatek ETB 1eko prime timean. 

Hego Euskal Herrian Tele5 da gehien ikusten den telebista katea %17,4ko ikusle kuotarekin.

Read more »