7 urteko ibilbide luzea Mihiluze saioak

Erraz esaten da, baina zazpi denboraldi luze egin dituzte etb1-en Kike Amonarriz eta Ilaski Serranok. 1000. saioa beteko dute ekainaren 10ean eta hori dela eta aste berezia ospatuko dute. Datorren astean, Mihiluzetik pasa diren Lehiakide Onenen Liga antolatuko dute. Historian zakurik handienak eskuratu dituzten eta egun gehien igaro dituzten 9 bikoteek parte hartuko dute liga honetan. 5000 euroko zakua egongo da jokoan.

1000. saioan berriz, famatuak izango dira lehiakide guztiak. Mikel Goñi eta Julian Iantzi talde batean, Urko Aristi eta Sara Gandara kazetariak bestetik eta Nagore Aranburu eta Mikel Pagadi aktoreak hirugarren taldean.  

Historia apur bat

2006ko otsailaren 2an ekin zion Orio ekoiztetxeak ekoitzitako saioak ibilbide luzeari. Ordu eta erdiko formatua zen hasieran baina ordu erdira murriztu zen beranduago. Orduz geroztik hainbat eta hainbat izan dira saiotik igaro direnak. 2008an Argia Saria jaso zuen. Udako ikastaro bat ere antolatu zen Mihiluzeren inguruan. 17. korrikaren amaierako mezua Kike eta Ilaskik irakurri zuten.
Mihiluzek gainera ETBko mugak gainditu  ditu. Kataluniako TV3n 'Bocamoll' izeneko hango bertsioak arrakasta handia lortu du 4 denboralditan. 'Mihiluze'k 3 mahai-jolas eta PC joko bat ere argitaratu ditu, jokoak web-ean jartzeaz gain. Bestalde, asko dira ikastetxeetan, euskararen egun edo asteetan zein herriko jaietan antolatu diren saio bereziak. 

Duela hilabete batzuk saioa barrutik erakutsi genizuen eremu ikusezinean. 

Read more »

Bertsoapp aplikazioa sareratu dute iPhone, iPad eta iPod gailuetarako

Mihiluze saioaren potokumeak frogaren antzeko jolasak eskaintzen ditu Abarkatxok garatu duen aplikazioak. Erabiltzaileak, oinak bertsoan jarri beharko ditu, dagokion tokian. Bertsoa amaitutakoan aplikazioak ondo dauden errimak berdez jarriko ditu eta oker daudenak gorriz. 200 bertsotik gora ditu aplikazioak eta bi multzotan sailkatuta daude: 4 puntutako bertsoak eta 8 puntutakoak.
Beheko helbideetatik deskargatu daiteke aplikazioa doan:
http://abarkatxo.com/appak.php
http://itunes.apple.com/us/app/bertsoapp/id520116115?l=es&ls=1&mt=8

Read more »

Eremu ikusezina: Mihiluze

Donostiako Euskal Irrati Telebistaren Miramoneko egoitzan grabatu dira hainbat eta hainbat saio. Lehiaketak, reallityak, telesailak, magazineak, late night show-ak. Azken formatu hau eta lehiaketa formatua nahastu eta Mihiluze sortu zuten 2006an Jon Garaño, Izaro Goenaga, Unai Ibarbia, Kike Amonarriz, Jose Mari Salinas eta Itziar Azpeitiak.

Mihiluze hasieran lehiaketa izateaz gain show-a ere bazen. Bideoak zeuden, aktoreen aktuazioak, epai-mahaia, Asiskoren tarteak... baina lehenengo denboralditik hona hainbat aldaketa egon dira saioan. Saioa nola egiten den ikusi nahi?

Youtubeko gure kanalean ere ikusi dezakezu.

Read more »

2011, ETBk ikusle gutxien izan duen urtea

ETB 1-ek %2,2ko ikusle-kuota izan du 2011an Bizkai, Gipuzko eta Araban. ETB 2-k aldiz, %8,14koa.

Bi kateek inoizko audientzia daturik txarrenak izan dituzte. Goenkale, Finlandia, Mihiluze eta kirol emanaldiak dira euskarazko katean gehien ikusten diren saioak. Horrek zerbait hobetu ditu kateraren bataz besteko datuak. Aipagarria da ETB 1-en azkenengo sei urteetan ikus-entzule gehien izan duen emanaldia Real Madril-Bartzelona Txapeldunen ligako final-erdietako partida izan zela %44,3ko kuotarekin.

ETB 2 katean berriz, La noche de..., El conquis eta Ni más ni menos magazinea dira ikusle gehien dituzten saioak. Vaya Semanita cambio radical saioari ondo etorri zaio aurpegi aldaketa eta oso datu txukunak izan dituzte lehenengo zortzi saioek. Hori dela eta zuzendaritzak Pausoka ekoiztetxeari kontratua berritu dio eta hilabete honetan bertan hasiko dira atal berriak emititzen. Lehenengo zortzi kapituluetan ikustako pertsonaiez gain (Goreti ileapaintzailea, Koro Echevarría, Benan, Mike, Nago...) Kontaidazu familia zein beste pertsonaia batzuk ere ikusi ahal izango ditugu atal berrietan. 

Arratsaldero, Anitzele eta Plató 2.0 saioak kendu dituzte eta Ai ama! izeneko ordu erdiko elkarrizketa saio bat aurkeztuko du Iban Garatek ETB 1eko prime timean. 

Hego Euskal Herrian Tele5 da gehien ikusten den telebista katea %17,4ko ikusle kuotarekin.

Read more »